Kawlphetha siam chhuah dan tur Governor leh CM-in an sawi dun

Governor Hari Babu Kambhampati leh chief minister Zoramthanga chuan April 11, Thawhṭanni tlai khan Mizorama kawlpetha tam zawk siam chhuah dan tur leh thil pawimawh dangte an sawi dun. Chief Minister hi Power & Electricity minister R Lalzirliana leh secretary H Lalengmawia ten an ṭawiawm.

Governor chuan, tun hnaiah Mizoram sorkar hmalakna ûm zui ngai nia a hriatte bawhzuiin Delhi-ah Union Power minister RK Singh and DoNER minister G Kishan Reddy a dawr thu Chief Minister a hrilh a, "Sorkar laipui pawhin Mizoram sorkar hmalaknate an ngai pawimawh hle niin ka hria," a ti.

CM Zoramthanga chuan, Governor-in a remhriatna leh ṭha a tih anga ṭhahnemngai taka sorkar laipui hotute a dàwr chu lawmawm a tih thu a sawi a, tuna Mizoram sorkar hmalakna pawimawh zualte a tarlang.

Hari Babu Kambhampati leh Zoramthanga hian Mizoram hmasawnna tura hmachhawpte leh tuna hmalakna kal mek pawimawh tak takte an sawi dûn a; chu'ng zingah chuan power sector-ah hmalakna lian tham kalpui a, tui luang leh nizung chakna hmanga kawlphetha tam zawk leh state khamkhawp siam chungchang a tel.

Power & Electricity minister R Lalzirliana chuan, an department engineer-te'n chiang zawk zirchianna an nei theih tur thu leh Mizorama lui luang chakna leh nizung chakna hmanga kawlphetha siam chhuah theih zat chhût chhuah sate bakah, project siamna atan thil ṭulte a tarlang a ni.