Kolasib DC-in ramria hmalakna a tlawh

Kolasib bawrhsap John LT Sanga chuan nimin khan Vairengte leh a chhehvela hmalakna hrang hrang a endik a; Aitlang leh Sabual muala Mizoram police duty-na hmunte tlawhin, a ṭula hman tur sum leh silpauline eng emaw zat a hlân.

Vairengte SDO (Civil) conference hall-a Vairengte khawtlang hruaitute nen an inkawmnaah Kolasib Bawrhsap chuan, DC mawhphurna ṭha tak a hlen chhuah a nih theih nan thawhhona ṭha a pawimawh thu a sawi a, "Chumi tur chuan inhmelhriatna leh inpawhna ṭha neih a ṭul," a ti.

John LT Sang chuan, hripui léng karah ram pumin buaina a hmachhawn laia luhkapui ber awmna Vairengte khaw mipuiin kawng hrang hranga an mawhphurnate an hlen ṭhin chu fakawm a tih thu sawiin, "Ramria buainaah pawh mi dang entawntlak khawpa ram leh hnam tana huaisenna leh tlawmngaihna an lantir ṭhin hi a ropui hle a ni," a ti a; khawtlang hruaitute nen khawtlanga harsatna awmte leh a sutkian dan tur an sawiho nghal.

Ramri venga duty Mizoram police-te a tlawhnaah Kolasib DC chuan, an inpekna leh an huaisenna fakawm a tih thu a hrilh a; ram tan a feh chhuak an nih angin, an hna rinawm taka hlen zel turin a fuih a ni.