MLA Thiamsanga’n thu dik lo a sawi - Congress party

Mizoram Pradesh Congress Committee (MPCC) chuan thuchhuah siamin, Health care Scheme (HCS) chungchanga MLA Dr ZR Thiamsanga thusawi chu thu dik lo a nih thu leh specialist doctor thil sawi duh dan chu mak an tih thu an tarlang.

MPCC chuan, Dr ZR Thiamsanga'n April 8, 2022-a Hnam Rûnah thu a sawiah, 'Mizoram state healthcare hi MNF bul ṭan a ni a, party dangin sawi tur an nei lo. La sorkar ve lo party phei chuan sawi tur an nei lo,' tia a sawi chu chhangin, "Dr ZR Thiamsanga hi hmeichhe enkawl thiam bik doctor lâr tak a ni a, hetiang thu buluk deuh sawi tura kan ngaih loh zinga mi a nih avangin mak kan ti hle a ni," an ti.

HCS chu MNF sorkar lai, April 1, 2008-a bul ṭan a ni tih sawiin MPCC chuan, "Kalphung felfai zawka siamṭhatu leh a taka kalpuitu chu Congress sorkar a ni. Congress-in health care system a siamṭhat hnuah leibá a awm ngai tawh lo a, hun rei lo te chhungin bill pek nghal zel a ni. Tuna tichhe leh vektu leh leiba tam tak siamtu chu MNF sorkar bawk a ni," an ti a; Congress chu MNF tihchhiat siamṭhatu an nih zel thu an sawi.

Congress party chuan, Dr Thiamsanga'n, 'MSHCS bul ṭan nan a tìrah sum báwmpui (corpus fund) siam a ni a, cheng vbc. 50 dah a ni,' a tih chu RTI Act hmanga zawhna chhanna aṭangin thu dik lo a ni tih chiang takin a lang tih an tarlang.

MPCC tarlan danin, Finance department-in April 5, 2022-a RTI Act zawhna an chhàn danin, MSHCS corpus fund chu ADB project Mizoram Public Resource Management hnuaia Health Sector Improvement péng pakhat a ni a, corpus fund atan cheng vbc. 117.80 dah a ni a, corpus fund dah kum chu Congress sorkar hnu, kum 2010-ah a ni. Cheng vbc. 50 chu corpus fund ni loin, MNF Vice President aṭanga paih tâk R Tlanghmingthanga fate hminga an thawhna Bajaj Allianz-a an dah pun zawk a ni.

Dr ZR Thiamsanga'n, 'Kum pangngai ni se healthcare bill bá kan nei lo ang, Covid vangin harsatna kan tâwk,' a ti pawh thu dik lo hmanga mipui hruai sual tumna a nih thu sawiin MPCC chuan, "Covid-19 vanga kan buai chhung zawng khan corpus fund pung cheng vbc. 4 chu Finance department-in quarter tin a pe chhuak zat zat a, hei hi Covid lên hmaa pek zat tho a ni. Healthcare fund buaina hi Covid nen a inkaihhnawih lo a, healthcare sum hmuh a tlakhniam phah miah lo," an ti.