Covid-19 inkaihhruaina ṭha taka zawm dan tur Lawngtlaiah sawiho

Zirna-inte hawn a nih tâk avangin nimin khan Lawngtlai bawrhsap Dr Andrew H Vanlaldika hoin a pisaah district chhunga zirna-in leh hostel-ahte Covid-19 laka himna tur Standard Operating Procedure (SOP) leh Covid Appropriate Behaviour (CAB) ṭha taka zawm a nih theih dan tur sawiho a ni.

Dr Andrew H Vanlaldika chuan, hripui léngin ziaawm lam a pan deuh avangin zirna-in leh hostel-te a pangngaia hawn ṭan a nih thu a sawi a, "Hripui léng a la kian loh avangin inthlahdah loa fimkhur sauh sauh a la ṭul," a ti.

Ṭhutkhawmah hian zirna-in leh hostel-te'n an zawm tur SOP ruahman sa chu DEO-in a hnuaia zirna-in hrang hrangah ṭha taka zawm a nih theih nan hriattirna tichhuak thar leh se, an ti a; LADC hnuaia zirna-inahte pawh SOP leh CAB-te ṭha taka zawm a nih theih nan EO-te'n ruahmanna siamin, a ṭul danin hma lo la se, an ti.

College, DIET, ANM School leh training institute dangte pawhin sorkarin ruahmanna a duante ṭha taka an zawm theih nan bawhzuiin hma lo la se, an ti bawk.