SEDP-ah vaimim chî sem mek a ni ; Mi 13,000 chuang pek an ni tawh

Mizoram sorkar flagship programme, Socio Economic Development Programme (SEDP) hnuaiah vaimim chi sem mek zel a ni a, nimin thleng khan mi 13,000 chuang pek an ni tawh. Vaimim chi pek tur mi eng emaw zat an la awm.

Vanglaini thu dawn danin, vaimim chi hi SEDP hnuaia sem a nih angin, a dawng tur pawh SEDP Board/Committee-in an thlang a; Agriculture department-in SEDP buaipuitute'n dawng tura an thlante hnenah an pe ṭhin.

Vaimim chi chu district hrang hrangah sem mek zel a ni a, a chî a thlen leh huna dawng tur pawh mi eng emaw zat thlan sa an awm a ni.

Nimin thleng khan SEDP hnuaiah vaimim chi mi 13,000 chuang pek an ni tawh a, dawng thar an awm zel avangin a zat chiah hriat theih a la ni rih lo. Mi pakhat hnenah vaimim chi ip khat (kg. 20) zel pek a ni.

Vaimim chi an sem ip (bag) páwn lama a lan dan chuan, vaimim chi chu National Agricultural Cooperative Marketing Federation of India Ltd. siam a ni a, ip khat Rs 5,851 man niin, kg. khat man chu Rs 292.55 tihna a ni. Hetih lai hian, vaimim chi hi Mizoram chhunga thartute hnen aṭangin sorkarin kg. khat Rs 25-in a leisak nia sawi a ni.

Vanglaini palai zawhna chhángin Agriculture department hotute chuan, vaimim chi chu a ipa inziak anga an lei loh thu sawiin, "Kg khat Rs 143.50 hisapin kan lei. A chi tura uluk taka sâwngbàwl a ni a, tualchhunga hralhna ai chuan a to deuh mai thei," an ti. Vaimim chi an sem hi bag khat Rs 2,870 man a ni.

Agriculture department hotute chuan, SEDP hnuaia sem tur vaimim chi chu quintal eng emaw zat mamawh a nih thu sawiin, "Mamawh zat ang hi tualchhungah chuan lei tur a awm lo a, a chi turin tuma'n tam tham lutuk an dah a rinawm lo," an ti a; tualchhunga thar chhuah vaimimte chu ar chaw siamna (factory) leh hmun dangahte an hralh ṭhin thu an sawi.