Ramri buai chinfel chungchang YMA CCC-in bawhzui zel a rél

YMA-a rorelna sang ber dawttu, Central Coordination Committee (CCC) chuan, Mizoram ramri sorkarin a rang lama a chinfel theih nan leh zirtirtu mahni post-a awm ṭha duh lote chungchang chu bawhzui zel a rêl.

YMA CCC hi nimin khan a vawi 93-na atan Bawngkawn South Cultural Centre-ah an ṭhukhawm a, Central YMA president R Lalngheta'n kaihruaiin, YMA General Conference 2021-a rorel bawhzui dan tur an rél a ni.

YMA CCC chuan, 'Mizoram ramri hi sorkarin a rang lama chinfel dan ngaihtuah rawh se' tih chungchang sawihoin, CYMA-in a bawhzui tawh dante an ngaithla a, "Bawhzui zel ni se kan ti," tiin thu an dah.

'Zirtirtu mahni post-a awm ṭha duh lote an post-a an awm theih nan CYMA-in hma la rawh se' tih chungchangah pawh CYMA-in a bawhzui tawh dan ngaihthlak a nih hnuah, "A ṭul angin bawhzui zel ni se," an ti.

'Ruihhlo chungchangah sorkar/kohhran/pawl dangte sáwmin inzirtirna nasa zawka kalpui ni rawh se' tih pawh bawhzui zel an rêl a; 'Zirna sikulah Mizo hnam làm zirtir a nih theih nan sorkarah thlen ni rawh se' tih chungchangah, "A hlawhtlin theih nan hmalak zel ni se. Hemi kawngah hian YMA-te tih ve tur a awm a nih chuan theihtawp chhuah a, a remchan dan angin branch-te inpeizàwn tlân ni se," an ti. 'Kan ram chhung thei phun uara sorkar nena ṭang duna hmalak ni rawh se' tih pawh bawhzui zel an rél bawk.