Bairabi-a kudamah kuhva rah dah Zampuimanga YMA-in FIR an thehlut
Zampuimanga Group YMA chuan, Bairabi North-a bamboo industry kudama kuhva rah dah a nih avangin nimin khan Bairabi Police Station-ah first information report (FIR) an thehlut.
Zampuimanga Group YMA chuan, February 23, 2022 khan bamboo industry kudamah hian Myanmar aṭanga lak luh kuhva ro dah khawm a awm thu an hria tih an tarlang a, "Hemi ni zan vêk hian Bairabi PS-a thawktute nen enfiah nghal niin, report dawn a nih ang ngeiin a lo awm ngei tih finfiah a ni. He Burma kuhva ro hi dan loa Mizorama lo lut a, tute emawin state páwn lama thawn chhuah tura an ruahman ni ngeiin a lang," an ti.
Kuhva rahin Bairabi a thlen theihna tura document hrang hrang bakah, e-way bill receipt pawh tun thlengin kuhva rah buaipuitute'n an la hmuh theih loh thu tarlangin Zampuimanga Group YMA chuan, "Kan huam chhungah hetianga sumdawnna felfai lo nia lang, zêp ṭhen ngai sumdawnna ang chi rêng rêng kan dodal tlat zel dawn," an ti a; police-te chu dan anga hma la turin an ngen a ni.
Vanglaini palai zawhna chhangin Zampuimanga Group YMA hruaitute chuan bamboo industry hi mimal ta, MNF sorkar hmasak hunlaia agarbati siamna hmun atana din a nih thu an sawi a, "Tunah chuan industry hi a function tawh lo a, a kawt vel hi teak thing dahkhawmna atante hman ṭhin a ni," an ti.