Tuialhthei phurh man chungchang Petroleum Secretary sawipui

Food, Civil Supplies & Consumers Affairs (FCSCA) minister K Lalrinliana chuan nimin khan sorkar laipuia Ministry of Petroleum secretary Pankaj Jain a kâwm a, Mizorama tuialhthei phurh luhna man chungchanga buaina a sawipui.

Sorkar thuchhuah tarlan danin, Petroleum secretary Pankaj Jain chuan Supply Minister ngenna leh thurawn angin tuialhthei phurh luhna rate chu Indian Oil Corporation (IOC) nen an lo en ṭhat tur thu a sawi.

Minister K Lalrinliana hian oil depot siamna tura ram endik leh zirchianna (technical feasibility)-te rang zawka kalpui dan tur a sawipui a; Petroleum Secretary chuan, railway siding (rél kawng pangngai aṭanga oil depot lama pênna tur) siam ngai pawh Railway ministry-in a rang lama zirchianna an neih theih nan hma a lak tur thu a lo hrilh a ni.