MADC inthlan chuh turin Mi 86-in hming an pe lut

May 5, 2022-a Mara Autonomous District Council (MADC) MDC inthlanpui neih turah seat 25 chuh turin mi 86-in hming an pe lut. MNF leh BJP-in seat awm zawng zawng an chuh dawn.

MADC inthlan turah hian nimin chawhnu dar 3 thleng kha chuh tumte tana hming pek luh theih hun a ni a; inhnûkdâwk duhte tan April 18 tlai dar 3 thleng hun hawn niin, May 5 zing dar 7 aṭanga tlai dar 5 thleng vote thlak a ni ang. Vote tlate chu May 9 zing dar 10-ah chhiar tur a ni.

MADC inthlan chuh tur hian MNF leh BJP-in seat 25, Congress party-in seat 23 leh ZPM-in seat pariat an chuh dawn a, mi panga in independent candidate ni turin hming an pe lut bawk. Congress party chuan Laty bialah independent candidate an thláwp dawn nia thu dawn a ni.

Inthlan chuh tum zinga hming pe lut zingah MDC ni lai 23 an awm a, chungte chu BJP 13, MNF paruk, Congress pathum leh ZPM pakhat (nominated) an ni.

MADC MDC inthlan­pui hnuhnung berah Congress party-in seat 17 lain an chak a, MNF leh MDF ṭang dunin MNF seat nga leh MDF-in seat hnih an la a, independent can­didate pakhat a tling bawk.

A hnuah Congress MDC-te chuan BJP an zawm vek a, BJP-in sorkar­na an chang zui a; mahse, mi pali chuan a hnuah BJP an chhuahsan leh a ni.