KHAWTHLIR

CM lawmthu hrilh
Indiana Falam Chin Community, USA hruaitute chuan nimin khan chief minister Zoramthanga a pisa-ah kawmin, Myanmar raltlante Mizoramin a lo tuamhlawm danah lawmthu an hrilh a, lawmpuina thilpek an hlan nghal.

Thisen pe
Mizoram Christian College NSS unit chuan nimin khan an college hall-ah thisen pek an huaihawt a, Civil Hospital, Aizawl tan thisen unit 33 an pe a, petute mipa 31 leh hmeichhia pahnih an ni. ṬKP, Bethani Unit, Lawngtlai pawhin nimin khan Lawngtlai District Hospital tan thisen unit 16 an pe a, petute mipa 15 leh hmeichhia pakhat an ni.

Dan loa zawrh khap
Lunglei district magistrate Kulothungan A chuan thupek chhuahin, Lunglei district-ah phalna nei loa gas, petrol leh diesel zawrh khap a nih thu a puang. Thupek hi thla hnih chhung atan a ni.

Zirlai himna zirho
Mizoram Social Defence & Rehabilitation Board, Social Welfare & Tribal Affairs department leh Ministry of Social Justice & Empowerment hnuaia National Institute of Social Defence chuan nimin khan Mizoram Hindi Training College-ah 'Awareness generation on drug abuse prevention' an buatsaih a; zirlaite hnenah ruihhlo hman ṭhat lohna leh mahni invên dan tur hrang hrang an zirtir a ni.

Minister-in tlawh
Minister of state TJ Lalnuntluanga chuan nimin khan Champhai bul Tuipui khuaa boxing hall sakna tur hmun a tlawh. Hall sak tum chu MLA-LADS fund leh Shyama Prasad Mukherjee Rurban Mission (SPMRM) sum hmanga sak tura ruahman niin, SPMRM aṭangin cheng nuai 40 leh MLA-LADS fund aṭangin cheng nuai 10 hmuh a ni.

Sikul hawng
Aizawl South-I bialtu MLA C Lalsawivunga chuan nimin khan Central Higher Secondary School-ah Science building sak thar a hawng. Central HSS Science building hi sorkar term hmasa hun laia bul ṭan tawh a ni a, C Lalsawivunga'n MLA fund a pek hmanga sak chhunzawm a ni. Kum 2019-20 khan Rs 6,00,000 a pe a, kum 2021-22 khan Rs 6,30,000 a pe leh bawk.