Indo-Myanmar border trade sawiho a ni

International Trade Initiative Forum (ITIF), Mizoram chuan nimin khan Raj Bhavan-ah Governor Hari Babu Kambhampati an kâwm a, Zokhawthar Land Custom Station (LCS) kaltlanga India leh Myanmar insumdawn tawnna pangngai taka a kal theih nan hma la tura ngenin, lehkha an thehlut.

Governor chuan, Mizoram chu sumdawnna hmunpui la ni thuai tur a nih thu sawiin, "Sumdawnna hmunpui ni turin kawngpui, rél kawng, KMMTTP leh hmasawnna ruhrel lian dangte hmangin Mizoram chei mek a ni," a ti a, Indo-Myanmar border trade pangngai taka a kal theih loh chhante zir chian a tum thu leh a ṭul anga bawhzui a tum thu a sawi.

Sorkar laipuiin a ṭhenawm ram nena insumdawn tawn leh inlaichìnna ṭha neih a duh tih sawiin Larsap chuan, "Sorkar laipui chuan ramria insumdawn tawnna a ngai pawimawh ngei dawn a, sumdawng duh tan awlsam taka bul ṭan theihna tur thlengin inkaihhruaina a siam ṭha chhunzawm reng a ni," a ti.

Hari Babu Kambhampati chuan, Zokhawthar LCS chungchangah, sumdawngte leh ITIF, Mizoramte inhmu khawm thuai se a duh thu te, sumdawnna kalpui harsa an tih chhante hriat chian a, sumdawnna kalpui duh zatte chiang zawka hriat a nih hunah Ministry of Commerce leh sorkar laipui dawr a tum thu te, sorkar laipui tan pawh thuam chak thuai ngai khawpa sumdawnna lian zawk kalpui tura ṭan lak a ngaih thute a sawi bawk.

ITIF Mizoram hruaitute tarlan danin, kum 1995-ah India leh Myanmar insumdawn tawnna chu Zokhawtharah bungraw inthleng ang deuhin bul ṭan a ni a, December 2015-ah India sorkarin ramri insumdawn tawnna pangngaiah a dah. Kum 2015 aṭanga tun thlengin Zokhawtharah mumal tak leh dan anga sumdawnna kalpui a ni lo a, chuvang chuan sorkar phal loh thil tawlh nan leh dan kalha insumdawn tawnna hmunah a chang a ni.

Zokhawthar LCS-ah hian sumdawnnain a ken tel zingah ran hriselna endik hmaa khung kawmna hmun te, ei tur endikna laboratory, weighbridge, warehouse, adt., a la awm lo a, thawktu pawh an awm mang lo. Bungraw inhlan chhawn dawna pawisa aia hman ṭhin letter of credit, bungraw thawn chhuahna hmun chhinchhiahna Country of Origin Labelling (COOL) leh insumdawn tawnna hmuna mamawh thil pawimawh zualteah harsatna tam tak a awm bawk.

Governor leh ITIF, Mizoram hruaitute inkawmnaah hian ITIF, Mizoram president PC Lawmkunga, IAS (Rtd), secretary Lalṭhuamliana bakah an member pathum - J Thattlinga, Rosiama Vanchhawng leh PL Liandinga te an tel a ni.