CM-in Mizoram Rahbi lawmman a sem

Chief minister Zoramthanga chuan April 12, Thawhlehni khan Mizoram Rahbi: Micro Startup Capital Competition 4.0-a ti ṭhate hnenah lawmman a hlân a; thil tereuhtêa ngaihte chu hlawhtlinna tlanga hruaitu a nih ṭhin thu a sawi.

Mizoram Rahbi: Micro Startup Capital Competition 4.0-a ti ṭhate hnenah lawmman hlânna inkhawm hi Planning & Programme Implementation department hnuaia Entrepreneurship Development Centre (EDC) buatsaihin Dawrpui Multipurpose Hall-ah neih a ni.

CM Zoramthanga chuan, "Thil ṭangkai leh ṭha tak tak ngaihtuah chhuah hi a bul ṭanna lian lo tê a ni fo, thil tereuhtêa kan ngaihte hi hlawhtlinna tlanga mi hruaitu a ni ṭhin," a ti a; lawmman dawngtute chu hmasawn zel tum turin a fuih.

Chief Minister chuan, a theih chen chenah entrepreneur-te'n state chhunga mi ngei hmanrua hmang se a duh thu a sawi a, sorkarin economy chawisan a tumna leh a hmalak meknaah entrepreneurship a ngaih pawimawh thu a sawi bawk.

Mizoram State Entrepreneurship Development Monitoring Committee (MEDMOC) chairman Dr Renu Sharma, chief secretary pawhin thu sawiin, Mizoram Rahbi intihsiakna ṭum linaa lawmman dawng pha mi 13 zingah hmeichhia pathum an tel chu lawmawm a tih thu a sawi a, "Lawmman dawngtute hi sorkar chuan thlahthlam loin a en thlithlai zui zel dawn a ni," a ti.

Mizoram Rahbi: Micro Startup Capital Competition 4.0-ah hian mi 13 an tel a, ni hnih chhung thil pawimawhte zirtir an nih bakah, finalist-te chu ni hnih chhung bootcamp neihpui an ni. Mi 71 zingah ti ṭha zual mi 13 thlan a ni a, an project azirin bul an ṭanna atan Rs 7,50,000 thleng sum pek theih a ni.