Champhai dist-ah ráltlân 8,747 an awm

Champhai district bawrhsap James Lalrinchhana leh line department hotute chuan nimin khan Myanmar ráltlânte awmna Mualkawi rama Sapianmaksak Refugee Camp an tlawh a; Champhai district-ah Myanmar ráltlân mi 8,747 an awm tih tarlan a ni.

Sorkar thuchhuah tarlan danin, Champhai district-ah ráltlân mi 8,747 an awm a; refugee relief camp 33-a awm mi 2,434 leh relief camp ni loa awm mi 6,313 an ni. Mi 8,747 zinga 8,601-te chanchin kimchang lâk a ni tawh a, mi 8,588 hnenah identity card pek a ni tawh.

Zokhawthar VC president Lalmuanpuia sawi danin, Zokhawtharah Myanmar ráltlân chhungkua 800 vel awmin, mi 4,000 chuang an ni a; Mualkawi ram Sapianmaksak Refugee Camp-ah ráltlân chhungkua 40 vela mi 150 vel an awm bawk.

Khawtlang hruaitute nen an inkawmnaah James Lalrinchhana chuan, harsatna leh mamawhte inhriatpui a, a ṭul anga hmalak dan turte ngaihtuahho a nih theih nan inràwnkhawmna buatsaih a nih thu a sawi a, "Ráltlân hminga lo kal, kan ram tichhe theite dan hnuaiah nasa taka kan do tlàn a ngai," a ti.

Champhai DC hi SP Lalrinpuia Varte, chief medical officer Dr R Lianmawia, district education officer TT Lalṭanpuia, PHE SDO Vanlalmuanawma, Power & Electricity SDO John Lalthlengliana, marketing officer Vanlalpara YMA sub-headquarters hruaitute'n an ṭawiawm a ni.