ZPM-in MADC-a an candidate tur an puang

ZPM working president K Sapdanga chuan nimin khan Siaha Tourist Lodge Conference Hall-ah May 5, 2022-a mara Autonomous District Council (MADC) MDC inthlanpuia ZPM candidate tur mi pariatte a puang.

ZPM hian MDC bial pariat - Tokalo, Laki, Saikao, Naohtlah, Siaha North-I, Siaha South-I, Siaha East-II leh Siaha West-I ahte candidate an nei dawn a ni.

Candidate puanna inkhawm hi ZPM MADC Election Committee chairman TBC Lalvenchhunga'n a kaihruai a; K Sapdanga chuan, tun ṭuma MADC inthlan chu ZPM-in an chuh vawi khatna tur a nih thu leh, an vawi khat chuhnaah bial pariatah candidate an nei thei chu ropui a tih thu a sawi.

ZPM tel loin MADC inthlan vawi 11 a awm tawh tih sawiin K Sapdanga chuan, "Tun ṭum a vawi 12-naah kan tel ve ta a, hmasawnna kan hmuhah hian kan lawm em em a ni. ZPM chuan sum emaw, kut tling lo, therhlo dang kan hmachhuan dawn lo a, MPF duh dan leh ram dan kan ngai pawimawh dawn a ni," a ti.

TBC Lalvenchhunga chuan, candidate tur ṭha tak tak an nei chu an lawm thu sawiin, "Candidate tur hrim hrim chu kan hmu ve nual a, amaherawhchu, MADC politics tihchîrì kan tum lo a, ram hmasawnnna siam thei turin ngaihtuahna uluk takin kan séng a, zirchianna nen mumal takin hma kan la a, heng bialahte hian kan chak thei ang, hma hruaitu tur kan mamawh a ni tiin candidate kan siam ta a ni," a ti a; an hun tawn chu MADC mipui tana rahbi thar a nih ngei a beisei thu a sawi.