Kum 2021-ah Serchhip district-ah Sikserh vangin mi pahnih an thi

Serchhip District Task Force on Immunization chu nimin khan an chairman Nazuk Kumar, district bawrhsap hoin an ṭhukhawm a; nikum 2021 chhung khan Serchhip district-ah sikserh vangin mi pahnih an thih thu tarlan a ni.

Ṭhutkhawmah hian immunization vaccine leh Covid-19 vaccine pek tawh dan te, sikserh donaa hmalak dan te, Deworming Day hman dan tur leh Health Mela neih dan turte an sawiho a; Serchhip chief medical officer Dr Lalzawmi, medical superintendent Dr ZD Lalmuanawma leh member dangte an tel.

Meeting-a tarlan danin, kum 2021 chhung khan Serchhip district-ah sikserh vei mi 45 hmuh chhuah a ni a, chu'ng zinga pahnih chuan an thihpui. Sikserh vei zingah ram hna thawka riahchilh ṭhin an tam ber.

March 2021 aṭanga February 2022 inkarah nausen kum khat hnuai lam hri danna (vaccine) pek tura ngaih Serchhip district-ah mi 1,111 an awm a, chu'ng zinga 879 hnenah vaccine an lak tur angte pek kim a ni a, vaccine la kim zat percentage chu 79 a ni.

Serchhip district-ah hian April 12, 2022 thlengin Covid-19 vaccine kum 18 chung lam mi 39,349-in dose hnihna an la tawh a, la thei tura ngaih mi 47,731 aṭangin 90% a tling. Mi 2,448-in precaution dose an la tawh. Kum 15-17 inkar zingah mi 2,132-in dose hnihna an la tawh a, target 3,305 aṭangin 69% vel a ni a; kum 12-14 inkar mi 1,821-in dose khatna an la tawh a, pek tur zata chhût mi 2,507 aṭangin 73% a tling.