Coaching kal turte fuihna hun hmang

MZP Gen.Hqrs chuan nimin khan an pisa conference hall-ah MZP bultuma Union Public Service Commission (UPSC) coaching class kal turte fuihna leh ṭawngṭaisakna hun an buatsaih.

Inkhawm hi MZP vice president Andrew F Lalramnghaka'n a kaihruai a; MZP president Lalnunmawia Pautu chuan, central service leh all India service-ah Mizo tling an tlêm tâk êm avangin Mizo zirlai, tumna tak tak nei tan UPSC coaching class kal tur sponsor turin hma an la tih sawiin, "Lâr tum vang emaw, hlâwkna tèl tum vanga buaipui kan ni lo a, kan ram leh hnamin a mamawh em avanga buaipui kan ni,"a ti.

Coaching kal turte hmaah MZP adviser Lalhruaitluanga Chawngte leh D Lalthanzami ten fuihna thu an sawi a, Rev. Biaksangzuala'n ṭawngṭaisakna hun a hmang a ni.

MZP chuan, UPSC coaching class kal tur buaipuina tura sum thawhtu minister panga - Dr R Lalthangliana, R Lalzirliana, K Lalrinliana, Dr K Beichhua, Robert Romawia Royte leh MLA Lalrinsanga Ralte bakah, School Education department leh National Business Enterprise-te chungah an lawm tak zet tih an tarlang.

MZP bultuma UPSC coaching class kal turte hi screening test leh personal interview hmanga thlan an ni a, a ti ṭha pahnihte chuan Vajiram & RAVI Coaching Centre, Delhi-ah naktuk, April 15 aṭangin class an ṭan dawn a ni.