Hripui vei inenkawl mek an tlem tial tial

April 12, Thawhlehni khan Mizoramah Covid-19 vei mi 91 hmuh chhuah a ni a, positivity rate 8.08% a ni. Nimin khan hripui vei dam tawh mi 120 chhuahtir an ni a, Covid-19 vei thi an awm lo. Hripui vei inenkawl mek an tlem tial tial a, nimin tlai khan mi 605 (0.26%) chiah an awm.

Covid-19 vei hmuh thar mi 91-te chu mipa 32 leh hmeichhia 59 an ni a; TrueNAT hmanga hmuh pakhat, RAT hmanga hmuh 88 leh FIA hmanga hmuh pahnih an ni.

IDSP record angin, Mizoramah Covid-19 vei 2,25,823 hmuh chhuah a ni tawh a, mipa 1,05,226 leh hmeichhia 1,20,597 an ni a, mipa aiin hmeichhia 15,371-in an tam zawk. Nimin tlai dar 5 thleng khan mi 2,24,529 (99.43%) chhuahtir an ni tawh a, mi 689 (0.31%) thi tawhin, enkawl mek mi 605 (0.26%) an awm.

Nimin tlai dar 5 dinhmun angin, Mizorama district 11 zingah Kolasib, Siaha, Lawngtlai leh Hnahthial district-ah Covid-19 vei enkawl lai 10 an tling tawh lo a; Serchhip, Mamit leh Lunglei district-ah 100 aiin an la tam thung.

Kum 2011 chhiarpui aṭanga chhûtin, Mizorama Covid-19 vei hmuh tawh 2,25,823 chu mi 1,000 zelah hripui vei mi 205 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.

April 12 khan India ramah Covid-19 positive mi 1,088 hmuh niin, state leh union territory 36 zingah Mizoram chu Kerala, Delhi, Haryana leh Maharashtra dawta positive hmuh thar tamna ber a ni.

Hmarchhak state pariatah Covid-19 positive mi 102 hmuh chhuah a ni a, chu'ng zinga mi 91 chu Mizorama hmuh niin, 89.22% a tling. Nagaland-ah mi pali, Manipur-ah pathum, Arunachal Pradesh-ah pahnih, Assam leh Meghalaya-ah pakhat ve ve hmuh a ni a; Sikkim leh Tripura-ah positive hmuh a ni lo.