Match thum chak zawn Chanmarians

Mapuia Memorial Mizoram Cricket League khelh laiah Chanmarians chuan match thum an khel tawh a, an la chak vek. Ningani inkhelah Chanmarians hian Kulikawn chu 30 runs-in an hneh.

Chanmarians hian point ruk hmuin table hma-hruaitu an ni a, team dang panga zingah vawi khat aia tam chak an la awm loh avangin an fal rih hle. An match lehpek atan April 18, Thawhṭanniah Luangmual nen an inhmachhawn leh ang.

Inkhel dangah Chhinga Veng chuan Bawngkawn South lakah 48 runs-in hnehna an chang a, match thum an khelh tawhah 3C hi an chak ve vawi khatna chauh a ni; Luangmual nen an inhnehtawk bakah Ramhlun Venglai an ngam lo.

Vawiin hian Suaka Cricket Ground, Sihhmuiah inkhel a awm leh dawn. Mahuma Memorial champion RVL leh Luangmual an inhmachhawn dawn. Luangmual hi hmun ruak aṭanga inlei tling ni mah se match hnih an khelh tawhah an che chhe lo, inkhel a hmuhnawm ang.

Chawhnu lamah Kulikawn leh Bawngkawn South an inkhel bawk ang. Bawngkawn hi chak ni hmel la hmu miah lo an ni a, team hlun Kulikawn tan an chetsual hnua insiamṭhat leh theihna remchang a ni dawn.

Vawiin Inkhel Tur
Ramhlun Venglai 09:00 AM Luangmual
Bawngkawn South 01:00 PM Kulikawn
Chanmarians (90/9) bt Kulikawn (60/10)
Chanmarians hi 30 runs-in an chak
Toss: Chanmarians lamin vuak hmasak an thlang
Chanmarians: Lalhmangaiha 34 (35); Saidingliana Sailo 17(23)
Parvez Ahmed 3/16(4); Fate of Rai 2/13(4)
Kulikawn: Fate of Rai 15 (14); Parvez Ahmed 11 (23)
Gilbert Libian Kulu 2/3 (1.5); Lalnunkima Varte 2/10 (4)
PoM: Lalnunkima Varte, Chanmarians
Chhinga Veng (147/7) bt Bawngkawn South (99/8)
Chhinga Veng hi 48 runs-in an chak
Toss: Chhinga Vengin vuak hmasak an thlang
Chhinga Veng: Sumit Lama 45 (27); Lalruatdika 22 (18)
Lalrinfela 2/14 (4); Zoramthanga 2/38 (4)
Moses Ramhlunmawia 1/16(3)
Bawngkawn South: Arbin Shahi 26 (23); Moses Ramhlunmawia 18* (17)
Sumit Lama 2/13 (4); Lalhruaimawia Ralte 2/15 (4)
PoM: Sumit Lama, Chhinga Veng