Bairabi-a kudama kuhva rah neitute'n Way bill an pekna document an nei ; Kuhva rah hmuh a nih hnua siam a ni

Bairabi North-a bamboo industry kudam pakhata kuhva rah dah neitute chuan Goods and Service Tax (GST) an pekna document an nei. Hetih lai hian, GST document an neih chu kudama kuhva rah dah Zampuimanga Group YMA-in an hmuh hnua siam a ni.

Tarlan tawh angin, Zampuimanga Group YMA chuan, February 23, 2022 khan bamboo industry kudamah hian Myanmar aṭanga dan loa lak luh kuhva ro dah khawm a awm thu an hria tih an tarlang.

Zampuimanga Group YMA chuan, "Hemi ni zan vêk hian Bairabi Police Station-a thawkte nen enfiah nghal a ni a, report dawn a nih ang ngeiin a lo awm ngei tih finfiah a ni. Burma kuhva ro hi dan loa Mizorama lo lut a, tute emawin state páwn lama thawn chhuah tura an ruahman ni ngeiin a lang," an ti.

Kuhva rah chungchangah hian Bairabi SDC hnenah FIR an thehlut a, mahse, SDC chuan Kolasib DC-te nen an inràwn hnuah an kut a nih loh thu Zampuimanga Group YMA hruaitute a hrilh. Chumi hnu, April 14, 2022 khan SDC chuan Barabi Police Station officer-in-charge hnenah dan hnuaia a ṭul anga hma la turin a hriattir leh a ni.

Kolasib-a thuthar thehdarhtu ṭhenkhat chuan April 14, Ningani khan Bairabi-a kudam chu an tlawh a, way bill peknaa hming lang Lalhruaizela chuan eng mah a hriat ve loh thu leh Aizawl lam mi Ruatfela, Bairabi-a in luaha khawsa chu a buaipuitu a nih thu a lo hrilh. Ruatfela chu telephone hmangin biak pawh a ni a, GST buaipuitu chu John Senate a nih thu leh eng mah a hriat ve loh thu a sawi ve leh a ni.

Kuhva rah neitute chuan way bill pekna tax invoice pahnih an nei a, pakhat chu April 12, 2022 (Thawhlehni)-a pek chhuah a ni a, pakhat chu April 13, 2022 (Nilaini)-a pek chhuah a ni. Kuhva rah ṭhenkhat chu rél hmangin thawn chhuah a ni a, mahse, Assam police-in an lo man nia thu dawn a ni.

April 12, 2022-a pek chhuah tax invoice-a a lan danin, kuhva rah chu Lalhruaizela, Bairabi Hmarveng ta a ni a, Bose International, Kolkata-ah rél hmanga thawn tur a ni. Way bill pekna tax invoice nia an sawia inziakah chuan, kuhva rah chu ip 580 niin, kg. 46,000 a ni a; kg. khat Rs. 250 anga chhutin GST 5% pek a ni. Kuhva kg. 46,000 chu Rs 1,20,75,000 man a ni a, chuta ṭang chuan GST Rs 5,75,000 an pekna ni awm tak invoice a awm a ni.

Way bill pekna document hi Taxation department pek chhuah a ni ngei tih finfiah theih a la ni lo a; Taxation department-a GST-in registration-naah kuhva ro a awm lo.

Hetih lai hian, Zampuimanga Group YMA chuan, February 23, 2022 khan kudamah kuhva rah an hmu tawh a, tax invoice chu April thlaa pek chhuah anga ziah a ni thung.