Covid-19 hi kan insiamṭhat theih nan Pathianin a rawn tírah ngai ang u - CM

Serchhip College chuan NAAC Grade A an hmuh thar chu April 14, Ningani khan an college tualah an lawm. Lawmna hun hmanpuitu chief minister Zoramthanga chuan, Covid-19 leng chu insiamṭhat theihna tura Pathianin a rawn tírah ngai ila a duh thu a sawi.

Chief Minister chuan, Covid-19 avangin hun rei tak zirna kalpui mumal theih a nih loh hnuin hun ṭha a inher chhuah thu sawiin, "He hun ṭha kan neih hi kan hman ṭangkai thiam a pawimawh. Hripui léng hi kan insiamṭhat theihna turin Pathianin a rawn tírah ngai ila, ram, chhungkua leh mimalah thil min hrilh tum a nei a ni tih rilruah awm se ka duh," a ti.

Serchhip College chu a lawmpui thu sawiin Zoramthanga chuan, "Grade ṭha tak in hmu thei hian zirlaite leh zirtirtute hmalakna leh college administration ṭha taka kenkawh a ni tih a tilang. A bul ṭanna a ni a, hei aia rahbi sang la kai zel turin duhsakna ka hlan a che u," a ti a; grade A an nih avanga an hmaa beiseina ṭha tak awm chu tihhlawhtlin tum turin a fuih.

Zoramthanga chuan, tumruhna neih a pawimawh thu sawiin, "Khawvelin mi bik nia a sawite chu mi narân ve mai, tumruhna nei tlat mite an ni. Bible-in, 'Keima an puia siam in ni' a tih hre rengin, Pathian anpuia siam kan nih avangin thil ropui tak tak kan ti thei. Tumruhna nei tlat mite chu an hlawhtling ṭhin tih hre reng u la, chu chuan hlawhtlinna tlangah a làwnpui dawn che u a ni," a ti.

Serchhip bialtu MLA Lalduhoma pawhin thu sawiin, "Mizoram mai ni lo, India ram pumah pawh Serchhip College hi a chhuanawm. Hetiang dinhmun thleng turin principal a pawimawh ṭhin a, faculty member-te leh staff-te pawh an chhuanawm hle," a ti a, zirlaite chungah pawh a lawm tak zet thu a sawi.

Lalduhoma chuan, career coa­ching centre mumal taka kalpui chhun­zawm a nih theih nan a MLA fund chu engtik lai pawhin hman theih a ni dawn tih sawiin, "Admi­nistrative building sakna tur chu Chief Minister-in a tiam angin tihhlawhtlin ngei ni tawh se a duhawm," a ti.

Serchhip College principal PC Lalremsiama chuan NAAC-in an enfiah zawh tâkah CGPA 3.18 pek an nih avangin a thawhpuite chungah lawmthu a sawi a; Serchhip DC Nazuk Kumar-i'n thu a sawi bawk.