CM Zoramthanga anga thil ti thei hmun dangah an awm lo - Robert Romawia

Minister of state leh MNF adviser Robert Romawia Royte chuan, chief minister Zoramthanga anga thil ti thei leh taima hmun dangah an awm lo niin a sawi.

Robert Romawia Royte hian April 14, Ningani khan Armed Veng South community hall-a Aizawl East-II MNF Block Political Training-ah thu sawiin, "Kan CM Pu Zoramthanga anga thil ti thei leh taima hi hmun dangah an awm ve lo. Union budget-ah khan bamboo link road atan cheng vbc. 100 Mizoram ta tur an ziak lut a, Aizawl by-pass road atan cheng vbc. 500 pek kan ni bawk a, Mizoram tana union budget aṭanga direct-a kan hmuh hi a vawi khatna a ni," a ti.

MNF Adviser chuan, Congress party president Lalsawta chungchang sawiin, "Aizawl East-II mipui mamawh chháng thei lotu hian Zoram mamawh hi engtin mah a chhang thei lo ang. Kum 10 chhung khan East-II ah eng nge a tih kan hria a, a intiam angin a awm lo hle a ni," a ti a; Lalsawta chu Aizawl East-II mipuiin kum 10 chhunga a thil tih an hriat chian thu a sawi.

ZPM chungchangah Robert Romawia chuan, MLA inthlan laia ZPM ang kha a ni tawh lo tih kohhran hruaitute thlengin an hre tawh nia sawiin, "ZPM chhunga awm ho hi mipuiin an hre chiang zel a, inthlan awm zel turah an nihna a lang ang," a ti. Ṭhalai leh zirlai hruaitu hluite'n MNF an thlang ṭhin nia sawiin, "ZPM leh Congress-ah mi pangngai an lut duh lo, an kiam mek zel. Tunah chuan MNF chauh loah chuan party dangah beisei tur a awm lo," a ti bawk.

MNF vice president Lalthlengliana pawhin thu sawiin, MNF din chhan te, a thil tumte leh a nihphungte a sawifiah. "Congress emaw, ZPM emaw ṭha nia ngai tlatte hian an bih chian loh vang a ni. Kan CM Pu Zoramthanga ang tluk hi Mizoramin kan la nei lo a, budget piah lama sum tam tak sawi chhuak ṭhin a ni," a ti.