Financial year 2021-2022 chhungin Mizoramah thisen unit 28,191 pek a ni

Sorkar kum liam ta, April 2021 - March 2022 chhung khan Mizoramah thisen unit 28,191 pek a ni a, chu'ng zinga unit 25,396 chu a thlàwna pek bik nei loa pek (voluntary donation) a ni. Kum 2021-22 chhunga thisen pek hi kum hmasaa pek zat aiin unit 1,533-in a tam zawk.

Mizoram State AIDS Control Society (MSACS) chhinchhiah danin, kum 2021-22 chhunga thisen a thlâwna pek unit 25,396 chu pek zawng zawng zat unit 28,191 aṭangin 90.08% a ni a, pek bik neia pek (replacement) unit 2,795 (9.92%) a awm.

Mizoram pumah blood donation camp ṭum 480 a awm a, chu'ng aṭang chuan thisen unit 16,070 pek niin, pek zawng zawng aṭangin 57.00% a ni a, kum hmasa aiin a hniam hret. Civil Hospital, Aizawl-in donation camp ṭum 162 neiin, an nei tam ber a, camp zawng zawng 480 aṭangin 33.75% a tling.

Mizorama blood bank 11 zinga thisen dawng tam ber Civil Hospital, Aizawl tan thisen unit 14,824 pek a ni a, kum hmasa aiin a tam; dawng tlem ber Mamit District Hospital-ah unit 407 pek a ni. ZMC blood bank-ah voluntary donation sang berin, 99.71% a ni a, kum 2020-21 chhung phei chuan 100% a ni. Voluntary donation hi Synod Hospital-ah hniam berin, thisen pek zawng zawng unit 2,997 zinga unit 2,424 (80.88%) chu voluntary a ni a, kum 2020-21 ah pawh a hniam ber (65.75%) tawh bawk.

Association for Voluntary Blood Donation (AVBD) president C Lalnunnema chuan, an pawlin kum 2021-22 chhunga voluntary blood donation target an siam chu 90% a ni tih sawiin, target an khûm thei chu lawmawm an tih thu leh thisen petute inpekna ropui an tih thu a sawi a; kum 2022-23 chhung atan pawh target 90% bawk an siam tih sawiin, target tlin leh ngei a nih theih nan thisen pek uar zel turin Mizo mipui a sáwm a ni.