Aizawlah silai leh a mû zuar 16 an awm
Home minister Lalchamliana chuan, Aizawlah silai leh silai mu zuartu arms & ammunition dealer 16 an awm mek thu a sawi.
Lalchamliana hian April 14, Ningani khan Falkland Venga silai kahna hmun leh silai enkawl inzirtirna hmun tura buatsaih Zakamlova Shooting Range a hawnnaah thu sawiin, "Mizote hian silai hi ro hluah kan ngai a, silai licence dil pawh an tam hle. Aizawlah ringawt pawh silai leh silai mu zuartu arms & ammunition dealer 16 lai an awm a ni," a ti.
Silai leh hriamhreite chu hna thawh nan leh mahni invèn nan thil ṭangkai tak a nih thu sawiin Lalchamliana chuan, "Chutihrualin, a chelektute an fimkhur tawk loh avanga sorkar phal loh sa pêl leh ramsa vehte an intipalh fo hi thil pawi tak a ni. Silai licence diltu reng rengin silai a enkawl thiam tâwk tih nemghehna police officer aṭanga an neih chu danin a phût tlat a ni," a ti a; shooting range chu silai license diltute tan thil ṭangkai tak a nih dawn thu a sawi.
Minister R Lalzirliana pawhin thu sawiin, shooting range chu silai kawl leh neite'n hnawksak lo leh him zawka silai an kahna hmun remchang a nih a beisei thu a sawi a, "Mizorama khualzinte tan an hun hnawh khahna tur thil ṭha tak a ni thei dawn a ni," a ti.