KHAWTHLIR

Easter Sunday
Naktuk Pathianni hi Isua Krista kraws-a khenbeh a nih hnua a thawh lehna champha, Easter Sunday a ni a, kohhran hrang hrangte'n an hmang dawn. Kohhran tam takah chuan zing karah Easter Sunrise Service hman a ni dawn a, Salvation Army-te chuan Isua thawh leh thu tawtawrawt hàmin an puang dawn. Kohhran eng emaw zat chuan chawhma inkhawm banah thingpui ruai an ṭheh dawn bawk a ni.

Thisen pe
KṬP, Ramthar Tlangveng Branch, Aizawl chuan an din champha pualin April 14, Ningani khan an kohhran hall-ah Synod Hospital tan thisen unit 34 an pe a, petute mipa 25 leh hmeichhia pakua an ni.

Kângmei laka fimkhur inzirtir
Fire & Emergency department chuan April 13, Nilaini khan LRM Hospital, Ramhlun Venglaiah kangmei laka inven dan leh kangmai chhuak tir ṭhelh dan zirtirna an buatsaih a, a takin an ti chhin nghal. He hunah hian Fire & Emergency Services aṭangin STO Lalremmawia leh a thawhpuite an kal a; Lalremmawia chuan kângmei laka inven dan leh hriat tur pawimawhte a hrilhfiah a ni.

Job Drive
Pachhunga University College leh Mizoram University leh Shri ProSkills, Hyderabad leh Omega Healthcare, Bangalore ṭangkawp chuan April 19, 2022 chawhma dar 10 aṭangin PUC campus-ah Job Drive an buatsaih dawn. He hunah hian graduate chin, communication skills english-ah nei ṭhate tan tel theih vek a ni. Hlawh structure (CTC) chu cheng nuai 2.6 per annum a ni ang.

Computer pe
Aizawl West-III bialtu MLA VL Zaithanzama chuan April 13, 2022 khan a bial chhunga zirna-in hrang hrang a tlawh kual a, Khatla East-a Thanbuka Middle School leh Bungkawn Vengthar Middle School hnenah computer a pe. VL Zaithanzama chuan, "Aizawl West-III chhunga sorkar zirnain hrang hrangte harsatna sutkian dan kan zawng zel dawn a ni," a ti.