Fire Service Week hman ṭan a ni

India ram pumah April 14, Ningani aṭang khan kangmei vèn haptá, Fire Service Week hman ṭan a ni a, Mizoramah pawh hman ṭan a ni. Kumina Week thupui chu 'Learn fire safety, increase productivity (I neih sa a pun leh zual theih nan kângmei lakah fimkhur zir ang che) tih a ni.

Fire Service Week hi Aizawlah chuan Fire and Emergency Services headquarters tualah hman a ni a, district hrang hrangah hman a ni bawk. India rama kângmei chhuak ṭhelhna lama thi mi pahnih sunna hun hman a nih bakah, martar thlanah pangpar dah a ni.

Fire Service Week hi sorkar department/pisa hrang hrangah April 18, 2022 khian thuchah chhiar chhuah a ni dawn a; All India Radio, Aizawl leh Doordarshan Kendra, Aizawl aṭangin thuchah leh sawihona buatsaih a ni ang.

Sorkar hmun pawimawh thlan bikahte Fire Safety Audit neih a ni dawn a, sikul hrang hrangah Fire & Evacuation Drill cum Lecture & Demonstration kalpui mek a ni a; high school zirlaite tan essay inziahsiak buatsaih a ni dawn bawk.

Fire Service Week 2022-ah denchhen hian Ministry of Home Affairs hnuaia Director General (Fire) chuan Mizoram Fire & Emergency Services-a thawk mi panga - STO Lalremtluanga Varte, STO Lalremmawia, FM Lalbiakhnuna, fireman Laldanzira leh fireman Jonathan C Lalruatfela (posthumous)-te chu an hnathawh ṭhat avanga chawimawina, Commendation Disc & Certificate dawng turin a thlang a ni.

Fire Service Day hi April 14, 1944-a Mumbai lawng chawlhhmuna indo lawng lian Fort Stikine kânga chhanchhuah hna thawhna lama thi mi 77-te hriatrengna atan hman ṭhin niin, April 14-20 chhung hman ṭhin a ni a; Week chhungin India rama fire service hrang hrangte'n kângmei laka himna tur inzirtirna an buatsaih ṭhin. Fort Stikine kângah hian Bombay Fire Brigade mi 66 leh Bombay Salvage Corps mi 11 an kâng hlum a ni.