North East on Wheels Expedition-a telte Governor-in thingpui ruai a buatsaihsak
Governor Dr Hari Babu Kambhampati chuan North East on Wheels Expedition-a feh chhuak Saza - Serow Team chu April 14, Ningani khan Raj Bhavan-ah thingpui a inpui. Saza - Serow Team hian Aizawl, Thenzawl leh Vairengteahte hun an hmang dawn a ni.
Governor chuan, India ram hmun hrang hrang aṭanga bike khalha Mizoram rawn thlengte chu Mizoramah hun hlimawm tak hmang turin a lo lawm a, "Mizoramah state páwn lam mite la hmuh ngaih loh hmun mawi tak tak, Mizo khawtlang nun entawn tlak tak tak leh sik leh sa nuam em emte hi páwn lam mite tana rawn zin nawn lehna tham a ni," a ti a; Mizo mipui chu mi hawihháwm leh khualzinte duat thiam, remna leh muanna ngainá an nih thu a sawi.
Mizoramah hmun mawi tak tak a awm rualin, páwn lamin an la hre pawh lo hle tih sawiin Larsap chuan, "Mizoram rawn tlawhtute pawh páwn lam mite tana Mizoram chungchang sawi hawngtu in nih ngei ka beisei a, in ṭhenrualte nen Mizoram rawn tlawh leh ngei ang che u," tiin a chah.
Tourism minister Robert Romawia Royte pawhin thu sawiin, sorkar laipui ruahmanna hnuaia hmarchhak state chhung leh hmarchhak mite khawsak dan hriat chian theihna hun biker-te hmanga buatsaih a ni chu dangdai a tih thu a sawi a, "Mizoram Tourism hnuaiah páwn lam mite'n Mizorama hun hlimawm tak an hriat reng turin tlawh tur leh belh chian tur tam tak a awm a ni," a ti.
Amazing Namaste Foundation chairman Atul Kulkarni chuan, North East on Wheels chu hmarchhak bial hriat chian zawkna tura AKAM-in an buatsaih a nih thu a sawi a; biker-te kalna apiangah programme awmze nei an buatsaih thu te, an kalna hmun leh mi chengte nena inbelh chianna hun a tam thei ang ber siam a nih thu te, team tinte chu km. 1,400 chuang zel hmarchhak bial hrang hrang fangin an kal kual dawn thute a sawi bawk.
Ni kaw chhung awh tur North East on Wheels Expedition-ah hian biker 75-te'n hmarchhak state hrang hrang an fang kual a; Saza - Serow Team-in Mizoram tlawhin, Aizawl, Thenzawl leh Vairengteahte hun an hmang dawn a ni.