Hripui vei enkawl lai 0.22% chiah an awm

Mizoramah Covid-19 vei April 13, Nilaini khan mi 78 leh April 14, Ningani khan mi 61 hmuh chhuah a ni a, nimin khan hripui vei dam tawh mi 203 chhuahtir an ni a, Covid-19 vei thi an awm lo. Covid-19 vei inenkawl mek an tlem tial tial a, nimin tlai khan mi 516 (0.22%) chiah an awm.

April 13, Nilainia Covid-19 vei hmuh thar mi 78-te chu mipa 36 leh hmeichhia 42 an ni a; RAT hmanga hmuh 76 leh FIA hmanga hmuh pahnih niin, positivity rate chu 10.47% a ni. April 14, Ningania hripui vei hmuh thar mi 61-te chu mipa 33 leh hmeichhia 28 an ni a, RAT hmanga hmuh 60 leh FIA hmanga hmuh pakhat niin, positivity rate chu 9.67% a ni.

Nimin khan hripui vei dam tawh mi 125 chhuahtir an ni a, Ningani khan mi 78 chhuahtir an ni bawk.

IDSP record angin, Mizoramah Covid-19 vei 2,25,962 hmuh chhuah a ni tawh a, mipa 1,05,295 leh hmeichhia 1,20,667 an ni a, mipa aiin hmeichhia 15,372-in an tam zawk. Nimin tlai dar 5 thleng khan mi 2,24,755 (99.47%) chhuahtir an ni tawh a, mi 691 (0.31%) thi tawhin, enkawl mek mi 516 (0.22%) an awm.

Nimin tlai dar 5 dinhmun angin, Mizorama district 11 zingah Kolasib, Siaha, Lawngtlai leh Hnahthial district-ah Covid-19 vei enkawl lai 10 an tling tawh lo a; Mamit leh Saitual district-ah 100 aiin an la tam thung.

Kum 2011 chhiarpui aṭanga chhûtin, Mizorama Covid-19 vei hmuh tawh 2,25,962 chu mi 1,000 zelah hripui vei mi 205 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.