Ramria kawng laihah Bialtu MLA-in Manṭang a tél ve em ni? - ZPM Ṭhalai

ZPM Ṭhalai chuan thuchhuah siamin, Mizoram leh Assam ramri hnaih hmun hrang hranga kawng laihna senso tam lutuk chu sawifiah turin bialtu MLA Lalrinsanga Sailo an phut a, ramri chu sum siamna atan hmang lo turin rorel lai party an chah.

ZPM Ṭhalaite chuan, October 20, 2021 aṭanga November 23, 2021 inkar, thla khat chuang hret chhungin Mizoram leh Assam inrina bawr vela kawng (link road) km. 70 vel laihna atan cheng nuai 1,800 chuang hman a nih thu sawiin, "Bialtu MLA Pu Lalrinsanga Ralte chu insawifiah ngei turin kan phût. Bialtu MLA hian ramria link road laihna aṭang hian manṭang a lo tél ve em ni, tih hi kan zawhna a ni," an ti.

Ramri hnaiha link road laihna atana sum hman tam lutuk chu MNF party-in sum siamna atana hman an duh avangin ramri a ngaihsak der a ni tih tilangtu a nih thu sawiin, "Sum leh pai leh mawm tamnaah lo chuan MNF hian hna an thawk tak tak peih lo tih leh, MNF-in tih tak zeta an buaipui tawh thilah chuan sum leh pai thilah hlemhlêtna lian tak a awm ngei ngei ṭhin tih a chiang hle," an ti a; MNF sorkar chu sum siamna atan ramri hmang lo tur leh ram leh hnam hmangaihna rilru dik tak pu chunga ramriah hmasawnna kalpui turin an phût a ni.