MADC MDC inthlanpui atana Hming pek luh pawm vek a ni

May 5, 2022-a Mara Autonomous District Council (MADC)-a member of district council (MDC) inthlan tura hming pek luh 86-te chu April 14, Ningani khan endik a ni a, a vaiin pawm a ni.

MADC MDC inthlan turah hian seat 25 chuh turin mi 86-in hming an pe lut a, hming pek luhte chu April 14 khan endik niin, pawm vek a ni a; inhnûkdâwk duhte tan April 18, Thawhṭanni tlai dar 3 thleng hun hawn a ni ang.

MADC inthlanpuiah hian MNF leh BJP-in seat awm zawng zawng an chuh dawn a, Congress party-in seat 23, ZPM-in seat pariat an chuh dawn a, independent candidate panga an awm bawk.

Hming pe lut zingah MDC ni lai 23 an awm a, chung zinga 13 chu BJP, MNF paruk, Congress pathum leh ZPM pakhat (nominated) an ni.