NGT thu angin bawlhhlawh hâl khap Bawlhhlawh hâl man an la awm lo

National Green Tribunal thupek angin Mizoram sorkar chuan December 1, 2018 aṭanga hman ṭan turin bawlhhlawh hâl a khap. Dan bawhchhiaa bawlhhlawh hâlte chu pawisa chawitir zel tur ni mah se, a bawhzuitu Mizoram Pollution Control Board (MPCB)-a thawkte chuan bawlhhlawh hâl man an la nei lo.

Environment, Forest and Climate Change (EFCC) department chuan June 2018 khan thuchhuah siamin, National Green Tribunal (NGT) thuchhuak angin, December 1, 2018-a hman ṭan turin bawlhhlawh reng reng hâl khap a nih thu a puang. Khapna thupek zâwm loa bawlhhlawh tam tham lo hâlte chu Rs. 5,000 chawi theihna a nih thu leh, bawlhhlawh tam tham hâlte chu Rs. 25,000 thleng chawitir theih a nih thu a chhuah a ni.

NGT thuchhuak anga thupek siam chung­changah hian MPCB member secretary C Lalduhawma chuan, Aizawl Municipal Corporation (AMC) leh UDPA department-ah bawhzuipui tura ngenna an thawn tawh thu a sawi a; bawlhhlawh hâl chu an tan hriat vek sên a nih loh avangin hâl an awm chuan thlalak nena an hnena thawn tura ngenin, a theih ang anga dân anga hmalak an tum thu a sawi.

MPCB Member Secretary sawi danin, bawlhhlawh hâl reng reng khapna hi Court-a thubuai lut remna vanga sorkar thuchhuah a ni a; YMA leh local council hnatlangah pawh ni se, bawlhhlawh hâl phal a ni tawh lo. District bika thupek kengkawh tur chuan DC-te kutah a awm a ni.

Bawlhhlawh hâl phal loh chungchanga MPCB-in ngenna an pek zinga pakhat chu AMC a ni a; AMC commissioner Dr H Lal­thlang­liana chuan, "Keimahniah chuan kan dânin a khap sa reng tawh a, staff kan indaih loh avangin action kan la chak thei lo mai zawk a ni," a ti a; Tuiriala bawlhhlawh paihte'n an hâl ngai tawh loh thu te, amaha kâng ṭhin chu an ṭhelh fo thu leh kâng ṭhelhtu pawl pawh an pun fo thu te, tunah chuan a vengtu tur mi 4/5 an dah thute a sawi.

AMC Commissioner chuan, SIPMIU, Aizawlin Tuiriala Solid Waste Management & Resource Centre an siam chu kumin De­cember 31 ral hmain zawh ngei an tum a, an tum anga an zawh hman chuan December 31-ah chuan Tuiriala dumping ground chu khâr hman a nih tur thu High Court-ah affidavit hmanga an thehluh tawh thu a sawi bawk.