Pathian kan dah pawimawh hmasa dawn - R Tlanghmingthanga

MNF party aṭanga MLA atana thlan tlin tharte leh MNF Elec­tion Directorate hotute chu nimin khan Mizo Hnam Rûnah an ṭhu­khawm a; an Election Direc­torate chairman R Tlanghmingthanga chuan, an kal dan turah Pathian an dah pawimawh hmasa ber dawn niin a sawi.

Meeting hi MNF Elec­tion Directorate vice chair­man K Vanlal­auva'n a kaihruai a; R Tlang­hmingthanga chuan, "Party leh legislature ṭha taka inzawmna neih hi kan kal­phung tur a ni. Kan kal dan turah Pathian kan dah pawimawh hmasa ber dawn. Mizo nationalism hi ṭha takin kan kalpui ang a, kan sorkar reng dawn a ni," a ti.

R Tlanghmingthanga chuan, inthlana thawk­tu hrang hrangte ṭhahnem­ngaihna leh thawhhona ṭhat thuah lawmthu a sawi a, "MNF chuan kan hmaa mite'n hna an lo thawh ṭhat chu kan malmâk ve dawn lo a, kan chhunzawm ang. Chhunzawm mai ni loin, thil ṭha an lo malmâk tawh pawh kan tharthawh leh ang," a ti a; MNF sorkar hmasaah an tih tur an ngaihtuah chawp a, chumi chhung chuan term khat a ral mai nia sawiin, tunah chuan tih nghal tur SEDP an duang sa vek tawh niin a sawi.

MNF Legislature Party deputy leader Tawnluia pawhin thu sawiin, MNF Legislature Party-in

ṭum hnih Governor an hmu tawh thu a sawi a, "December 15-ah Raj Bhavan-ah swearing-in ceremony neih kan tum a, inbuatsaihna kan kalpui mek. Kumin inthlanah result ṭha tak kan neih chungchangah Zoram mipui hnenah lawmthu ka sawi a ni," a ti.