December 18-ah session

MNF Legislature Party secretary Lalruatkima chuan, December 15, Inrinnia lak luh tur MNF sorkar thar chuan December 17, Thawhṭanni aṭangin pisa an luah ṭan dawn thu a sawi a, "December 18-ah Assembly session koh nghal a ni ang," a ti.

Lalruatkima hian nimina a ina MLA-a thlan tlin a nih lawmna buatsaihah thu sawiin, "December 15 chhun dar 12-ah sorkar thar lak luh a ni dawn a, minister turte hming list pawh vawiin khan Governor hnenah thehluh a ni tawh," a ti a; sorkar thar lak luhnaah hian hunserh hman a nih bakah, Halleluia Chorus sak a nih dawn thu a sawi.

Sorkar thar hmalakna hmasa tur sawiin Lalruatkima chuan, "Pakhatnaah chuan Mizorama kawngpui chhiate chu kum tharah chei ṭhat hna thawh nghal a ni ang. Pahnihnaah chuan, zu vanga harsatna leh mipui ṭawngṭaina chu Assembly budget session-ah ngaihtuah nghal tur a ni. Pathumnaah chuan, sikul timing kalpui mek vanga naupang hriselna ṭha lo leh zing hnatlang culture bo tate ennawn a ni," a ti.