KHAWTHLIR

Zirlai thlah
Presbyterian Kohhran Hmeichhiate'n an din leh enkawl, Women Centre, Phunchawnga puanṭhui zir batch 4-na leh puantah zir batch hnihnate thlahna inkhawm nimin khan hman a ni. Inkhawm hi Kohhran Hmeichhe chairman K Lalliantluangi'n a kaihruai a, Women Centre superintendent R Lalrinpuii'n report a pe a, Synod executive secretary i/c Kohhran Hmeichhia Rev. PC Pachhunga'n certificate a sem a ni.

Advance Christmas
MJA chuan vawiin hian Aizawl Press Club-ah Advance Christmas an hmang dawn a, Aizawla awm MJA member-te chu an kawppuite nen tel vek turin an hriattir. Chawhnu dar 3:30-ah programme ṭan a ni ang. MJA chuan, mi ṭanpuina turin an member-teah Charity Fund atan sum an khawn mek bawk a, a la pe lote tan pek zel theih a ni a; MJA member ni lo tan pawh pek theih a ni.

Sorkar thiat
Governor Kummanam Rajasekharan chuan December 12, Nilaini khan Indian Constitution-a Article 174 Clause (2)(b) tlawhchhanin Mizoram sorkar (Seventh Mizoram Legislative Assembly) a ṭhiat. Mizoram sorkar thar, Mizoram State Legislative Assembly pariatna chu naktuk chhun dar 12 hian Raj Bhavan-ah lak luh a ni ang.

Free clinic
Kolasib KVK chuan nimin khan Buhchangphai khuaah thlai leh ran a thlawna endikna hun, free clinic an buatsaih a, thlai leh buh lama harsatna neite tan leh ran lama harsatna neite KVK Scientist-te'n hun an hmanpui a, damdawi a thlawna sem a ni.

Republic Day
Nimin khan Lunglei DC conference hall-ah SDO (S) Lalnundika hoin Lungleia Republic Day, 2019 hman dan tur rel a ni a, ruahman dan chuan Republic Day hi Ṭhuamluaia Mualah zing dar 10 ah hman a ni ang.