Traffic SP-in dan bawhchhiate Report ṭhin turin mipui a sáwm

Traffic SP H Ramthleng­liana chuan, traffic dan bawhchhiate chu traffic control room telephone leh mobile phone number - 0389-2322307, 0389-2313061, 9366553559 leh 9774440722-ahte report theih a nih thu a sawi a; mipuite chu dan bawhchhiate report ṭhin turin a sáwm.

H Ramthlengliana hian nimin khan a pisaah thuthar thehdarhtute a kâwm a; traffic police-te chuan mi man ngawr ngawr an tum lo tih sawiin, "Keini chuan man ngai tumah awm lo se tih hi kan duh dan a ni. Tun dinhmunah chuan ni khatah dan bawh­chhiate pawisa tlingkhawm Rs. 10,000-te a chuang ṭhin. Hei hian mipuite an fimkhur lohzia a tilang," a ti.

Theihtawp chhuah mah se, traffic police-te chu hmun tina duty turin an indaih lo tih sawiin Traffic SP chuan, "Chuvangin mipui nen kan ṭanrual a pawimawh hle. Dan bawhchhia hria leh hmute chuan rawn report se hma kan la zui ang. Mipui kan him zawkna atan dan bawhchhiate report hi a pawimawh," a ti a; lirthei neitu leh khalhtute chu dan ngai pawimawh turin a chah.

H Ramthlengliana chuan, hunpui lo thleng turah lirtheia chetsualna a thlen lohna atan theihtawp an chhuah tih sawiin, "Khualzin phur maxicab khalhtute chu an chhuah dawn leh an rawn thlenah breath analyser hamtir ṭhin an ni a, hei hi a sâwt khawp mai. Mipuite pawh lirthei khalhtu a ruia kan hriat chuan i chuang lo ngam ang u, traffic police hnenah report mai tur," a ti.

Traffic SP thuchah Ṭhenkhat
* Rûi chunga lirthei khalh lo turin driver zawng zawngte ngen an ni a, chutih rual, chuan mipuite'n rûi chunga lirthei khalhtu an hriat chuan ngawihbopui mai loin, thuneitute hnenah thlen nachang hriat.
* Lirthei ṭha tâwk lo chu vantlang kawngpuiah khalh chhuak lo ila, a brake pump ngai, a driver bik hre riau, a ke pawh mám tak tawh head-light pakhat chauh eng thei, a part ṭhenkhat tuamhlawm nana thirzai leh rubber leh chártín bung hial hman ngai tawhte pawh hi hunpui boruakah hian mipui leh bungrua phurh nan hmang lo turin kan inngen.
* Driving license nei loin lirthei khalh lo ila, chutiang bawkin driving license nei lo lirthei i khalhtir lo ngam ang u.
* Phurh tur aia tam bungrua leh mihring lirtheiah i phur lo ang u.
* Hunpui a lo thlen hian mi tam takin bazar kan pan khawm ṭhin a, tawhsual kan tawh loh nan kawngpui emaw junction lai kan kan dawn a nih chuan traffic police duty thu ngaichangin kawng kân ṭhin tur a ni.