Hmun hrang hrangah Organic Fair buatsaih

Agriculture department bultumin nimin khan Mizoram hmun hrang hrangah Paramparagat Krishi Vikas Yojana (PKVY) hnuai­ah Organic Fair buatsaih a ni a, kut hnathawktute'n thlai leh thei an thar chhuahte an pho chhuak.

Organic Fair hi Lungleiah chuan District Industries Training Hall-ah buatsaih a ni a, Lung­lei District MJA president H Lalthansanga'n a hawng. H Lalthansanga chuan, chemical tel lo thlai ei tam chu mihring hriselna atan thil pawimawh a nih thu a sawi a, "Tunlaiah damdawi chi hrang hrang hmanga enkawl thlai kan ei nasat avangin kan hriselnain a tuar ṭhin. Hetiang a nih avang hian chemical tel lo thlai thar chhuah kawngah nasa zawka ṭan lak a ngai hle," a ti.

Lungleia Fair-ah hian stall 14 hawn a ni a, Lunglei leh a chhehvel khua aṭangin chemical tel loa enkawl thlai leh pangpar bakah, organic lei ṭhate pho chhuah niin, man tláwm zawka hralh a ni.

Siahaah chuan Organic Fair hi Agriculture Complex-ah buatsaih a ni a, Fair hawn inkhawm chu DAO-in kaihruaiin, SDC Dr Saithangpuia'n a hmanpui.

Dr Saithangpuia chuan, India ram chu Agriculture lama hma kan sawn viau tawha a lan laiin, thei leh thlai thar chhuahte chu pesticide, insecticide leh thil dang hmanga enkawl leh sâwngbâwl a ni ṭhin tih sawiin, "Kan thlai thar vawiin nia kan pho lante hi a hmel enin tláwm mah se, a hriselin, ei atan a him em em a ni. Kan chawhmeh leite hi a hmel mawina leh a hlâwkna chauh ngaituah loin, a hrisel tâwk em, eng hmanga sawngbawl leh enkawl nge a ni tihte ngaituah a, kan fimkhur hle a ngai," a ti.

Serchhipah chuan Agriculture Complex-ah Organic Fair buatsaih a ni a; Fair buatsaih chhan sawitu DAO James Lal­siamliana chuan, "PKVY hi CSS zinga pakhat a ni a, he scheme hian a tum ber chu buh leh bâl, thlai thar chhuahte hi damdawi thil reng reng leh thlai kahna damdawi hmang loa thianghlim taka thar chhuah a ni," a ti.

Sialsukah pawh Organic Fair buatsaih a ni a, Sialsuk, Sailam, Sumsuih, Samlukhai leh khaw dang aṭangin lo neitute thlai thar chhuah pholan a ni.