Coronavirus lakah Mizoram a la him
Health & Family Welfare (HFW) department chuan principal director Dr F Lallianhlira hmingin nimin khan thuchhuah an siam a; Mizoram chu Novel Coronavirus (2019-nCoV) hri lêng lakah a la him zel tih an puang.
Health department tarlan danin, tun hnaia China ram aṭanga Mizorama lo haw mi pangate chu in lamah mi dang nena inchiahpiah vak loin fimkhur takin an awm mek a ni. Chutianga an awm hran chhan chu, Coronavirus an kai vang ni loin, sorkar laipui leh state sorkar fimkhurna vanga hmalakna a ni a; an hriselna dinhmun ni tin endik niin, nimin thleng khan insawiselna an nei lo.
China aṭanga rawn hawte zinga mi pathum chu laboratory-a endik turin thisen sample laksak an ni tawh a, pahnih chu NICED Laboratory, Kolkata-ah thawn tawh niin, Coronavirus an kai lo ve ve tih finfiah a ni.
Coronavirus hriléng hi ram 28-ah a lut tawh a, mi 28,000 chuangin an kai tawh. Mi 500 chuangin an thih phah tawh laiin, mi 1,500 vel chu an dam leh tawh. India ramah chuan Kerala-ah Coronavirus kai mi pathum hmuh a ni tawh a, India ram state dang zawng erawh an la him thung.
Coronavirus-in Mizoram a thlen loh nan Mizoram sorkar chuan thâ thlah loin hma a la zel a; nimin khan chief secretary Lalnunmawia Chuaungo hoa State Level Coordination Committee on Zoonotic Diseases ṭhukhawm chuan, Coronavirus hriléng chungchanga sorkar hmalaknate an thlir a ni.