Ruah, thlipui leh rial tla vangin khaw 13-ah in 240 vel a chhia

April 16, Inrinni tlai khan Kolasib district leh Mamit district-ah nasa taka ruah, thlipui tleh leh rial tla vangin khaw 13-ah in 240 vel a chhia a, mihring thi leh hliam an awm hriat a ni lo.

Kolasib aṭanga thu dawn danin, Inrinni tlai khan Kolasib district hmun eng emaw zatah nasa taka ruah a sur bakah, thlipui a tleh a, nasa takin rial a tla bawk. Hei vang hian in 220 vel a chhia a, chu'ng zinga 27 chu luah zui tlak lohin a chhia; mihring thi leh hliam erawh an awm lo.

Nimin chawhma lam thlenga Kolasib DC pisain report a dawn danin, thlipui tleh hi Pángbâlkàwn khuain tuar na berin, in 126 a chhia a, chu'ng zinga 27 chu luah zui tlak lohin a chhia. Bairabi-ah in 30, Meidumah in 28, South Chhimluangah in 23 leh Kolasib Saidanah in 10 a chhe bawk a, khaw dangte chu in 10 aia tlem a ni hlawm.

Meidumah hian in pakhat chu luah zui tlak lohin a chhia a, Rengtekawnah in pahnih leh Kolasib Hmarvengah in pakhat luah zui tlak loh a awm bawk.

Thli tleh avangin thing tlu leh thing zâr tla eng emaw zat a awm a, hei vang hian kawlphetha lamah harsatna tênau a awm a, Inrinni zan zanlai velah Kolasib khawpuiah chuan power supply a awm leh hman a ni.

Mamit district-ah chuan tlai dar 3 velah thli na tak a tleh a, hriat theih chinah Kolalian khuaah in 18 vel a chhia a, chu'ng zinga in pali chu a tlu darh vek a, in dangte chu a chung leh a bang chhia a ni hlawm.

Kolalian-a chhiatna thlen thu hriat a nih veleh Kawrthah SDO(C) Ngulzathuama, Zawlnuam BDO ni bawk chuan hma a la nghal a, Kolalian-a harsatna tâwkte tawm hulna tur leh an in khuh hulna tur silpauline eng emaw zat a pe a ni.