Mizoram Hindi Shikshak Sangh-in Pawl 10 thleng Hindi zir an thláwp

Mizoram Hindi Shikshak Sangh (MHSS) chuan thuchhuah siamin, sorkar laipuiin India rama pawl 10 thleng sikula compulsory subject-ah Hindi telh a tum chu lawmawm an tih thu an tarlang a, a taka a hlawhtlin ngei theih nan hmasawn duhna rilru nen ṭan la thar turin Mizoram mipui an sáwm.

MHSS chuan, zirna sikulah pawl 10 zirlaite'n Hindi an zir vek theihna tura sorkar laipui ruahmanna chu tihpuitlin a nih chuan Mizorama zirlaite'n Hindi ṭawng ziak leh chhiar thiam kawngah nasa lehzualin hma an sawn ngei tur thu an sawi a, "Hindi hi India rama ṭawng pawimawh ber pakhat a nih avangin Hindi thiam hi zirlai leh mipui náwlpui hian kan mamawh hle a, Hindi zirtirtu tán pawh hmasawnna leh chona duhawm tak niin kan hria," an ti.

Hindi subject chu pawl 10-ah exam tel a nih loh avangin ngaih pawimawh a hlawh loh phah ṭhin tih sawiin MHSS chuan, "Hetianga Central sorkarin Hindi ṭawng tihhmasawnna atana hma a la hi sawisel leh do mai lo a, a pawimawhna leh a ṭulna hriaa Mizoram sorkar pawhin a tihpuitlin ngei kan beisei," an ti a; sorkar laipui ruahmanna chu a taka a hlawhtlin ngei theih nan ṭan la thar turin Mizoram mipui an sáwm a ni.