ASF tuartute zangnadawmna pek hun tur hriat a la ni lo
Vawk pûl hri, African Swine Fever (ASF) vanga vawk suat neitute hnena zangnadawmna pek hun tur leh zangnadawmna atana Mizoram sorkarin pawisa a thawh ve turte a pek hun tur hriat a la ni lo.
Sorkar laipuia Ministry of Fisheries, Animal Husbandry & Dairying hnuaiah scheme awm sa hmangin ASF vanga vawk suat neitute tan zangnadawmna dil theih a ni a, sorkar laipui leh state sorkarin pawisa a inzat (50:50)-a an intum sem a ngai.
Mizoram sorkar chuan sorkar laipuiah zangnadawmna Rs 11,69,94,414 a dil a, March 22, 2022 khan sorkar laipui chuan Mizoram sorkar hnenah ASF vanga vawk suat neitute zangnadawmna tur Rs 5,84,97,000 a rawn pe a ni.
Sorkar laipuiin sum a rawn pek hi Mizoram sorkarin zangnadawmna a dil zat Rs 11,69,94,414 aṭangin a zatve vel, 49.99% a ni a, Rs 414-in a zatve a tling lo. Sorkar laipuiin a rawn pek bak zawng chu Mizoram sorkarin a tum ve a ngai dawn.
Vanglaini thu dawn danin, Mizoram sorkarin zangnadawmna tur aṭanga 50% a tum ve tur hi a pek hun tur hriat a la ni lo a; hei vang hian ASF vanga vawk suat neitute hnena zangnadawmna pek theih hun tur hriat a la ni lo.
Tarlan tawh angin, March 2021 aṭang khan Lunglei district-a Lungsen khuaah chhan hriat loha vawk thi a awm ṭan a, AH&Vety department-in an zir chian hnuah, sorkar laipui chuan April 15, 2021 khan Mizoramah ASF a léng tih a puang.
March 2021 aṭanga December 30, 2021 thleng khan Mizorama khua/veng 272-ah ASF vangin vawk 29,824 a thi a; ni 35 chhung ASF vanga vawk thi a awm loh hnuah, February 4, 2022 khan Champhaiah ASF vangin vawk a thi leh ṭan a ni.
Kumin 2022-a ASF a lèn thar leh hnuah nimin thleng khan ASF vangin vawk 770 a thi tih finfiah a ni tawh. ASF vanga thi nia rinhlelh, laboratory-a finfiahna nghah mek 205 leh vawk suat 124 a awm tawh bawk.