Inbumna lakah fimkhur turin chah

Mizoram Police chuan thuchhuah siamin, phone/laptop hlui zawrh leh hna lem hmanga inbumna lakah fimkhur turin mipui an chah a; police hnena phone/laptop rûk nia rinhlelh zuar hriattirtu nihna thup a nih dawn thu leh lawmman pek an nih tur thu an tarlang.

Mizoram Police chuan, phone/laptop rûk emaw, a hlui emaw chu a hmangtu hmasain thil sual tih nana a hman tawh a nih chuan a lei chhâwngtu tan buaina thlen theitu a nih thu a tarlang a, "Hetiang zuartute chu a neitu dik tak an ni em tih hriat nan an leina bill/memo hlui phût tel ṭhin tur. Bill/memo dik a ni em tih chian nan phone-a IMEI inziak (enna *#06#) nen a inmil em tih en ṭhin tur a ni," a ti a; phone/laptop rûk nia rinhlelh zuarte chu police hnena hriattir vat tur te, hriattirtu nihna thup a nih dawn thu leh lawmman pek an nih tur thute a tarlang a ni.