Mizoram sorkar hmalaknate Union Joint Secretary-in a tlawh

Ministry of Housing and Urban Affairs joint secretary Pankaj Kumar Singh chuan ni thum chhung chámin Mizoram a rawn tlawh a; UDPA leh PHE department bakah, SIPMIU hmalaknate a tlawh bakah, April 16, Inrinni zing khan deputy chief minister Tawnluia chu a chênna inah a kâwm a, Mizoram sorkar hmalaknate an sawi dun.

Deputy Chief Minister chuan, Mizoramah ngei kala sorkar hmalaknate a en chu fakawm a tih thu Union Joint Secretary a hrilh a, "Hetiang taka kan department chan hnuaia hmalaknate rawn ngai pawimawhtu hi an tam lo hle," tiin, a department chan hnuaia sorkar laipui scheme hrang hrang chungchang leh hmalak chhunzawm dan turte a sawipui a ni.

Pankaj Kumar Singh chuan, Mizoram sorkarin a lo dawnsawn dan a lawm thu sawiin, "Mizorama kan department hnuaia hmalaknate a theih ang anga chipchiarin ka tlawh a, ka hmuh tawh chinah sorkar hmalakna a ṭha a, a lawmawm hle a ni," a ti.

An department chan hnuaia hmalaknate theihtawp chhuaha a ngaihven zui tur thu sawiin Pankaj Kumar chuan, rawtna chi hrang hrang an thlente chu theihtawp chhuaha a bawhzui tur thu Dy. Chief Minister a hrilh.

Pankaj Kumar Singh hi India hmarchhaka urban scheme leh programme-te vil tura ruat a ni a, April 13, 2022 khan Aizawl a lo thleng a, a chàm chhung hian PHE leh UDPA department bakah SIPMIU hmalakna chi hrang hrang a tlawh a ni.