Hripui vei enkawl mek zat 528 (0.23%)

Mizoramah Covid-19 vei April 15, Zirtawpni khan mi 53 leh April 16, Inrinni khan mi 96 hmuh chhuah a ni. Nimin leh Inrinni khan hripui vei dam tawh mi 136 chhuahtir an ni a, Covid-19 vei mi pakhat a thi. Covid-19 vei inenkawl mek nimin tlai khan mi 528 (0.23%) an awm.

April 15, Zirtawpnia Covid-19 vei hmuh thar mi 53-te chu mipa 26 leh hmeichhia 27 an ni a; RAT hmanga hmuh vek niin, positivity rate chu 38.41% a tling. April 16, Inrinnia hripui vei hmuh thar mi 96-te chu mipa 37 leh hmeichhia 59 an ni a, RAT hmanga hmuh vek niin, positivity rate chu 10.47% a ni. Inrinnia hmuh chhuah zinga mi 24 chu Hmunṭha khuaa mite an ni.

Nimin khan hripui vei dam tawh mi 26 chhuahtir an ni a, Inrinni khan mi 110 chhuahtir an ni bawk.

IDSP record angin, Mizoramah Covid-19 vei 2,26,111 hmuh chhuah a ni tawh a, mipa 1,05,358 leh hmeichhia 1,20,753 an ni a, mipa aiin hmeichhia 15,395-in an tam zawk. Nimin tlai dar 5 thleng khan mi 2,24,891 (99.46%) chhuahtir an ni tawh a, mi 692 (0.31%) thi tawhin, enkawl mek mi 528 (0.22%) an awm.

Nimin tlai dar 5 dinhmun angin, Mizorama district 11 zingah Lawngtlai district-ah hripui vei enkawl lai mi pakhat chiah a awm tawh a, Siaha leh Kolasib district-ah mi 10 an tling tawh lo bawk. Saitual leh Mamit district-ah mi 100 aia tam an la awm thung.

Kum 2011 chhiarpui aṭanga chhûtin, Mizorama Covid-19 vei hmuh tawh 2,26,111 chu mi 1,000 zelah hripui vei mi 206 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.