Champhai hmasawnna tur sawiho

Champhai khawpui thianghlim, mawi leh hrisel siam tura hma latu - Clean, Beautiful and Healthy Champhai Town Committee chu April 16, Inrinni khan DC conference hall-ah an ṭhukhawm a, an adviser Dr ZR Thiamsanga, MLA-in a telpui.

Dr ZR Thiamsanga chuan, hripui léng vanga sum indaih loh avangin duhthusamin hmasawnna an ngaihtuah thei lo chu pawi a tih thu a sawi a, "Chutih rualin, Health department kaihhnawihah Champhai district hi Mizorama thawk ṭha ber pawl a ni thei hi a lawmawm. Champhai chei mawina tur te, faina leh hriselna lama hmasawnna turah ṭanhona hi kan innghahna lungphùm tur a ni," a ti.

Champhai district-in lìrnghîng, ran pùl hri leh ráltlân vangin hun khirh tak a tâwk tih sawiin ZR Thiamsanga chuan, "Sorkar tan hna thawhna hun tam awm lo mahse theihtawp chhuah zel a ni a, Champhai aṭanga Aizawl kawng double lane siam kal mek bakah, JJM hnuaiah ni zung chakna hmanga tui lâkna kalpui thuai tum a ni," a ti a; District Hospital, Champhaiah cheng vbc. 21.38 séngin khum 50 awmna tur Critical Care Centre leh khum 50 awmna tur Ayush Hospital din tuma hmalak a nih thu a sawi.

Champhai district bawrhsap James Lalrinchhana pawhin thu sawiin, Champhai khawpui mawi, fai leh hrisel nei turin hripui léng karah pawh hmalak a ni tih a sawi a, "Ṭhahnemngai taka MLA leh khawtlang hruaitute'n Champhai hmasawnna atana ke an pên hi a lawmawm tak zet," a ti.

Ṭhutkhawmah hian sorkar department hotu te, tlawmngai pawl leh political party hruaitute an tel a; kum 2019-a bul ṭan tawh 'Clean, Beautiful and Healthy Champhai hnuaia sub-committee pathumte'n hma an lak tawh dan leh hmachhawpte an tarlang a, bawhzui dan tur, hmalak dan tur leh rawtna bakah, Champhaia Mizoram Youth Commission (MYC) hnuaia Coaching Centre dahna tur hmunhma chungchang an sawiho a ni.