RD block 26-ah Health Mela buatsaih dawn

Sorkar laipuia Ministry of Health and Family Welfare-in a ruahman angin, India ram state zawng zawngah India Independence vawi 75-na lawmna, Azadika Amrit Mahotsav pualin vawiin aṭanga April 29, 2022 thleng RD Block tinah Health Mela (Hriselna Kûtpui) buatsaih a ni dawn. Mizoramah chuan RD block 26-ah a thlawna inentirna buatsaih a ni ang.

Health Mela-ah hian damlo inentirte tan damdawi-ina an health record hrang hrang an dahṭhatna tur Health ID (ABHA ID) leh healthcare hnuaia health insurance card (Ayushman Bharat PM-JAY Card) siamsak a ni dawn.

Natna inkài chhâwn theih loh - zunthlum, BP sang, ka chhung, hnute leh chhûl cancer-te test nghal theih a ni dawn a; medicine, surgery, ENT, eye, dental, obs & gynae, paediatrics specialist doctor-te'n clinic neiin, a thlawnin damlo an en dawn a, a ṭul angin investigation leh a thlawna damdawi sem a ni bawk ang.

Taksa hriselna atana thil pawimawh chi hrang hrangte zirtirna hun hman a ni dawn a; taksa sawizawina hun hman a ni dawn. National health program hrang hrang - nu leh naute hriselna, indanna, HIV/AIDS, zûk leh hmuam leh ruihhlo tihrehna tur, cancer programme, leprosy, TB, malaria leh vun natna, mit (eye) leh a dangte inzirtirna tur IEC an sem dawn bawk.