KHAWTHLIR

Thisen pe
April 16, Inrinni khan ṬKP, Aizawl Zotlang Bial chuan Civil Hospital, Aizawl tan thisen unit 93 an pe a, petute mipa 85 leh hmeichhia pariat an ni. General PYD (Mizoram)-in thisen pek an huaihawt a, mipa 57 leh hmeichhia pangate'n ZMC tan thisen unit 62 an pe. KṬP, Kolasib Hmarveng Bial pawhin District Hospital tan thisen unit 63 pein, petute mipa 40 leh hmeichhia 23 an ni a; Hmarveng Branch aṭangin mi 36, Saidan Branch aṭangin mi 17 leh Electric Veng Branch aṭangin mi 10-in an pe a ni.

MADC EVM endik
Mara Autonomous District Council inthlana vote thlakna atana hman tur electronic voting machine (EVM)-te chu April 16, Inrinni khan Siaha DRDA conference hall-ah endik thawh khatna, first level checking neih a ni a, political party hrang hrang aiawhte telin, vote thlak chhin (mock poll) nghal a ni. Inthlanah hian EVM 140 hman a ni dawn a, 81 chu polling station 81-ah hman tur niin, 59 chu thlavéng (reserve) atan dah a ni a; ni thum chhung endik a ni ang.

PUC-ah job drive
Mizoram University, Pachhunga University College leh Shri ProSkills, Hyderabad leh Omega Healthcare, Bangalore-te ṭangho chuan vawiin chawhma dar 10 aṭangin PUC campus-ah Job Drive an buatsaih dawn. He hunah hian graduate chin, communication skill (English) nei ṭhate tan tel theih a ni a; hlawh structure (CTC) chu kum khatah cheng nuai 2.6 a ni.

Bazarpui endik
Champhai North bialtu MLA Dr ZR Thiamsanga chuan April 16, Inrinni khan Champhai Rahsi Venga Bazarpui a tlawh a, district hotute nen Bazarpui chei ṭhat leh thawm ṭhat ngaite an endik.

Minister-in tlawh
Minister of state Robert Romawia Royte chuan April 16, Inrinni khan a bial, Aizawl East-II chhung Chite Venga Convention Centre sakna tur hmun a tlawh a, Chite Veng Inpuiah khawtlang leh tlawmngai pawl hruaitute nen an inkâwm a ni.