Langtlang sorkar kan din dawn - Zoramthanga

MNF chuan nimin khan Mizo Hnam Rûnah Assembly inthlan neih zawh tâka hnehna an chan vanga Pathian hnena lawmthu sawina hun an hmang. MNF president, vawiina chief minister atana lak luh tur Zoramthanga chuan thu sawiin, langtlang sorkar an din tur thu a sawi.

Zoramthanga chuan, langtlang sorkar, mi zawng zawngin sorkar hmalaknate an hriatpui theih tur sorkar din an tum thu sawiin, "Project kalpui tur reng reng eng atan nge, sanction zat leh contractor hming mipuite'n an hre thei vek ang. Langtlang sorkarah chuan a corrupt tak tak theih loh. Minister leh MLA-te huai taka an kal dawn avangin, tun hmaa sorkar awm tawh zawng zawng a khûm dawn a, mipui zawng zawngin malsawmna kan dawng ang," a ti.

MNF President chuan, Pathian vang liau liaua sorkarna siam thei an nih thu sawiin, "MNF hruaitute leh thawktute chakna a ni lo a, nuamsa taka sorkar siam thei turin MLA 26 min pe a ni. Pathianin rorelna min pe a, a thu kan âwih chuan malsawmnain min vûr ang. Pathian hian a ram tizau turin min duh a, Mizote hi Chanchin Ṭha puang darh tura thuam kan ni a, chumi atan MNF-te min ko a ni," a ti a; hausak thûr thûrna atan MNF chu Pathianin a sorkartir loh thu a sawi.

Thil tih dawn leh thusawi dawntein MNF din chhan, 'Pathian leh kan ram tan' tih ngaihtuah zel tura an party mite chahin Zorama chuan, "Sorkarna min petu hi Pathian a ni tih hriat reng tur a ni a, Ama tana hna thawk turin min duh. Kan sorkarna hi kawng dang atan hman phal a ni a, sorkarna min petu Pathian duh dana hman tur a ni. Mani tum dan angin kal tur a ni lo. SEDP hnuaia hmasawnna hna kan thawh tur hi mi tin ta tur a ni," a ti.

Zoramthanga chuan, thil thar mak tak, la hmuh ngai loh lak luh vak vak a tum lo tih sawiin, "Mizoramah dinchhuahpui theih tur thil tam tak a awm a, Mizoramin malsawmna a dawnte hi kan hmang ṭangkai dawn. Rua chungchang ka sawi, 'Internet-ah pawh ka hmu lo, a awm tak tak chuan sawi chiang rawh se,' tihte ka dawng ṭhin. Ka rua sawi ang hi Bangalore aṭangin Pu Hawla sorkar khan an la lut ṭeuh a, chumi bawk chu a ni kan lak luh tur chu," a ti a; Congress sorkarin raw lian chi hman ṭangkai dan an hriat loh thu a sawi.

Bial tin aṭangin minister atan an bialtu MLA dah tura ngenna a dawn thu sawiin MNF President chuan, "Minister bialah hmasawnna a tla nasa bik dawn lo a, Zoram pumah a tla rual dawn. Minister bial nih vanga ropuia inngaih loh tur. Party, sorkar leh mipui tana ṭha ber tur leh Pathian duh dana hna thawh theih dan berte ka thlir kual a, MLA mal ka thlir lo. Chumi ang chuan Cabinet Minister tur ka ruat. Minister a nih vek theih loh tih bial mipuite'n an hriat a ṭha," a ti.