Winter Festival hman mek a ni

Tourism department chuan Tuirial Airfield-ah Winter Festival vawi hnihna an buatsaih mek. He Festival hi December 13, Ningani khan chief secretary Arvind Ray-a'n a hawng a, vawiinah chhunzawm leha zawh a ni ang.

Winter Festival hawnna inkhawm­ah Chief Secretary chuan, Tourism department-in kawng hrang hranga hma an lakna chu fakawm a tih thu sawiin, Winter Festival chuan Mizoram chu zin mite tana tlawh châkawmah a siam ngei a beisei thu a sawi.

Tourism director Biakthanmawia pawhin thu sawiin, Winter Festival chu Mizoram mipuite intihhlimna atan leh ram páwn aṭanga zin mi hîp nan buatsaih a nih thu a sawi a, "Kan hnam ziaráng, làm leh zai mawi takte pho chhuak a, ram páwn zau zawk aṭanga zin mite kan hîp luh deuh deuh theih nan Winter Festival-a kan mikhualte duat thiam ila, Zo nun mawi i pho chhuak zel ang u," a ti.

Nimin khan a ṭanna inkhawmah Tourism department joint director Irene Zohlimpuii Chongthu chuan, Winter Festival hlawhtlinna atan mipui ṭawiawmna a pawimawh thu leh mi zawng zawng tel se an duh thu a sawi.

Winter Festival-ah hian intihhlimna hrang hrang buatsaih a ni a; thalkah, food court, hot air balloon, zorbing, powered paratrike, painting, orchid exhibition-te a awm. Hnam lâm leh zaite entir a ni a, zaipawl leh mimal zai eng emaw zat a awm bawk.