Aizawlah Vijay Diwas hman a ni

India sipaite'n Pakistan sipaite an hnehna ní - Vijay Diwas, kum tin December 16-a hman ṭhin chu Mizoramah pawh nimin khan hman a ni a; ram tana nunna hlântute hriatrengna thlânah zahna leh hriatrengna pangpar dah a ni.

Vijay Diwas puala inkhawm hi Aizawl Treasury Square-a War Memorial-ah nimin zingkar khan neih a ni a; War Memorial lungphunah hian Governor Kummanam Rajasekharan, chief secretary Arvind Ray, Home secretary Lalrinliana Fanai, DGP Balaji Srivastava, Assam Rifles DIG Brig. Vinod S leh mi pawimawh dangte'n zahna pangpar an dah.

December 16, 1971 khan Ramna Race Course, tuna Suhrawardy Udyan ni ta, Dhaka, Bangladesh-ah India sipai hotu Lt.Gen. Jasgit Singh Aurora hnenah Pakistan general Amir Abdullah Khan Niazi leh a sipai 93,000-te chu India laka tlâwmin an inpe a ni. He ni pawimawh hriatrengna atan hian kum tin India ram hmun tinah Vijay Diwas hman ṭhin a ni.