KHAWTHLIR

Assembly session
Governor Kummanam Rajasekharan chuan December 18, Thawhlehni chawhma dar 10:30-ah Assembly session a ko a, ni hnih awh tura ruahman a ni. Session hi MLA thar lak luhna atan te, Governor thusawina hun atan te, Governor thusawi sawihona atante leh House member thi sûnna hun atante hman a ni ang.

Pro-tem speaker
Mizoram MLA atana thlan tlin tharte rinawmna thu tiamtira MLA atana la luttu tur, speaker lailâwk (pro-tem speaker) atan Tuikum bial aṭanga MNF ticket-a thlan tlin Lalrinawma ruat a ni. Lalrinawma hian December 18, Thawhlehni khian MLA atana thlan tlinte Assembly House-ah rinawmna thu tiamtirin MLA atan a la lut ang.

Heroin man
Excise & Narcotics department-a Anti-Narcotics Squad chuan December 13, Ningani chawhnu dar 3:10 khan Rangvamual Mel 3-ah heroin gram 110 (hawng 8) leh a neitua puh mi pahnih - Zonunsiami (42) d/o Liandawla (L) leh Lalchhawnthanga (40) s/o Thanghlira (L), Rangvamual Mel-3 nia in­chhal ve vete chu an man. Mi pahnihte hi NDPS Act, 1985 tlawhchhanin thubuai siamsak an ni.

Jubilee lawm
Darlawn High School ­chuan nimin khan an kum 50-na, golden jubilee an lawm a, an sikula lut tawh ṭhin mi ṭhahnem takin hmanpuiin, tlaiah jubilee lawmna ruai an ṭheh a ni.

Serluiah tla
Nimin chawhnu dar 4 pelh hret khan Serluiah Tuikhuahtlanga DC quarters-a khawsa tlangval pahnih - K Lalhluzuala (23) s/o K lalzarmawia leh Lalrin­tluanga (20) c/o Lalsiamliana te an tla a; he thu ziah lai (tlai dar 6) thleng khan hmuh an la ni lo a, an tla hlum a nih rin a ni.

Labour court duh
National Trade Union of Mizoram (NTUM) General Assembly, December 13, Ninga­nia Vanapa Hall-a neih chuan, Mizoramin labour court a neih ve theih nan hmalak zel an rel. NTUM hian kum 2019-20 chhunga NTUM General Headquarters office bearer tur an thlang a; president-ah C Rem­tluanga, vice president-ah Lalhruaitluanga Sailo leh treasurer-ah Lalrinchhana te an thlang a ni.