Mizoram sorkar thar lak luh a ni

Mizo National Front (MNF) kaihhruai Mizoram sorkar thar chu December 15, Inrinni khan Raj Bhavan tualah lak luh a ni. Chief minister atan MNF president Zoramthanga chu Governor Kum­manam Raja­shekharan-a'n rinawmna thu tiamtirin a la lut.

Sorkar lak luhna inkhawm hi chief secretary Arvind Ray-a'n a kai­hruai a; Mizoram Kohhran Hruai­tute Committee (MKHC) chairman Rev. R Lalhming­thanga, Synod mode­rator-in hun­serh a hmang a, tun ṭum hi Mizoram sorkar lak luhna inkhawmah Bible chhiar leh ṭawngṭai a awm vawi khatna nia sawi a ni.

Governor chuan chief minis­ter Zoramthanga thu a tiamtir hmasa ber a, cabinet minister dang panga leh minister of state pangarte thu a tiamtir leh a; an thutiamte chu ram danpui hnuaia rinawmna thu leh sorkar thuruk vawng tlat tura intiamna a ni.

MNF senior vice president Tawnluia chu deputy chief mi­nister nihna pek a ni a, tun ṭum hi Mizoramin dy. chief minister a neih ṭum thumna a ni a, Lal Thanhawla leh Lalhmingthangate chu dy. chief minister atana ruat an lo ni tawh.

Minister-te'n thutiam an chham zawhah The Leprosy Mi­ssion Choir-in Halleluiah Chorus an rem a; hei pawh hi Mizo­ram sorkar lak luhnaa an tih vawi khatna a nia thu dawn a ni.

Mizoram sorkar thar lak luhna inkhawmah hian chief minister hlui Lal Thanhawla pawh a tel a; state páwn aṭangin Meghalaya chief minister Conrad K Sangma, Assam Agriculture minister Atul Bora, Assam CM hlui Prafulla Kumar Mahanta, MLA-te an tel bawk.